TANA TUMPA BADARA

 

DAR SABANG SAMPE MERAUKE,..

BA’JALANG BULA BALE MAAR RAYAT SANGSARA BAKU GEPE,..

BA’DONCI MANGGUREBE VOOR MANGENTE,..

BA’JANJI RABU-RABU VOOR MO BKING BAE,..

ISKEREK BA’UJONG VOOR PAROP DIRI LA PARLENTE,..

BAPAKAMPONANG PAMARENTA EE,..

MAAR SU TALALU LAI EE,..!

KAMORANG SU PARSIS DENG PAPALELE,..

VOOR SAKEPENG BAJUAL RAYAT SEPE-SEPE,..

BAKARANG KIRI KANANG, BAPUAR DENG PUTAR BALE,..

RAYAT ANCORLELE DENG KAMORANG PUNG ABULEKE,..

DO’E GAME-GAME BIKING RAYAT DAPA GADE,..

HOO E, JANG MAANO VOOR DIRI TALALU LABE,..

JANG SENANGGALE DENG BAKELE MACANG IKANG GETE-GETE,..

RAYAT PUNG HATI SU TAROBE,..

BEAR AKANG LAI EE,..

DARA SU MALELE PONO DALANG SEMPE,..!!

KALO SU REU, PI MAENG DALANG MANGE-MANGE LABEBAE,..

JANG MULU BABUSA MACANG OMBA PICA DI PANTE,..

JANG BIKING VOOR TANA TUMPA DARA AKANG BADARA LAI EE,..

INGATANG EE,..

BEAR WARNA KULI AKANG TABAGE,..

BEAR ADA SALAM DENG SARANE,..

BEAR ADA WAYANG GOLEK, YOSPAN DENG CAKALELE,..

MAAR ALE DENG BETA SAMUA SAT’RANGKE,..

INGA HATI JUA SUDARA EE,..

JANG BIKING SAMPE MERA PUTI AKANG MUSTI TAROBE,..GANDONG EE,..